剛開始搞智能家居時，有好多地方都搞唔清楚，例如:
智能家居一定要有網關? 係咪有一個網關就咩智能設備都用得?
係咪聲控到開關就算智能? 係咩好貴先做得到智能家居?
其實智能設備都分好幾種通訊技術: WiFi，藍牙，射頻(RF)，Zigbee，紅外線，ZWave。
其中除左WiFi之外，其他都需要經網關去控制。
至於反應方面，WiFi比較快，機本上接近即刻有反應，但用電比較多，Zigbee/紅外，因為先傳送指令去網關再傳去相關設備，會比較慢，但用電非常少，以開燈為例，大約有半秒delay先著到燈，至於其他例如射頻、ZWave我仲未玩過，但估計都係差不多。
價錢方面，初入門多數會先用小米，因為唔貴(係唔貴，唔代表最平)，同埋容易設定。
Homekit就比較貴，同埋要有中樞(iPad/Apple TV/HomePod)先可以做到自動化或係街外控制家中設備。
比較平嘅就有易微聯/Sonoff等等，但安裝同設定未必太適合啱啱接觸嘅新手。
上咗手之後，可以考量用HomeBridge或者HomeAssistant將第三方設備整合去其中一個平台，即係就算你用好多種唔同智能設備，例如又有小米，又有塗鴉，又有易微聯，又有d IP Cam，都可以整合去同一個平台，而唔需要分開用好幾個app去控制唔同嘅智能設備。
至於我自己就主要用小米(溫濕度計，人體感應，光照感應，微波爐，紅外萬能搖控)，易微聯(開關制面)，塗鴉(電制，拖板)，Boardlink(紅外/射頻搖控)，再用Homebridge整合去iOS嘅HomeKit同Android嘅Google Home，即係不論用Android定係Apple都一樣可以用到所有智能設備，同做到自動化，例如: 光照度低 感應到有人 自動開燈；溫度高於某個溫度 感應到有人 開風扇/開冷氣 等等。所以智能家居唔好諗住對住個電話叫佢開咩熄咩，而應該做到更加人性代，係你有咩需要時佢就自動幫你做咗。
至於點樣開始，點樣設定，點樣做整合，之後會再開文講解。