由淺入深，先講講小米系列，如果單純只用小米app控制同埋設場景，
已經滿足到個人需求嘅話，其實係可以考慮所有智能設備都用小米，
但我個人就比較想用返HomeKit(因為用iPhone)，
所以並唔係全部野都用米家。
因為唔係所有米家智能設備都Support HomeKit。
如果你係打算只用米家就足夠，基本只要買個多功能網關，
再加你需要嘅設備就可以。
上一篇都提過，智能家居並唔係搖控/聲控開關電器/燈咁簡單，
而應該做得更加人性化、自動化，係你需要嘅時候就自動開/關。
而要做到呢個效果，一般都要用到感應器。
大致上較常用嘅就係 溫濕度計、人體感應、光照感應、門窗感應。
當然如果會用到好複雜嘅場景，可能仲會用到水浸感應、空氣檢測儀等等。
跟住就係電器/燈嘅開關，牆上面嘅開關制，燈制，可以用綠米開關，
我試嘅時候市面上最新仲係綠米D1開關，但我打緊呢篇文章嘅時候，
已經出左綠米E1，E1個Size比D1更細，就算個箱底唔太大都裝到。
PS: 提醒一下大家，一般香港嘅燈制都係無零線，
除非裝修時有叫裝修師傳拉埋零線，
如果唔係，一般都只可以買單火線版。
PS2:電嘅野，最好都係搵返有牌專業嘅水電師傳整啦🤪
另外如果有需要可以買埋無線開關，變相可以係其他位置都開關到某電器，
甚至開始某個場景，以我自己為例，就Set左單按一下係"返到屋企"(開某啲必開電器/燈)，
連按兩下係"離開屋企"(關晒所有電器/燈)，其實佢仲可以set長按，但我未諗到set咩好😆
電器方面，可以買智能插座、智能拖板，但小米無出英式款，
如果電器都打算用米家控制，你可能要剪左個英式三腳插換大陸三腳或兩腳；或者加個轉插。
將各個配件根據說明書方法加入米家
(大部份都係點右上角+號，再點右上方格，掃瞄說明書QR Code)
PS: 記得地區要揀"大陸地區"，大部份呢D設備都唔Support香港地區。
PS2:最好買返大陸行貨，唔好買香港版，因為未必加到入"大陸地區"米家。
加完設備之後，就可以係場景度set條件，以下圖為例，
我set咗偵測到有人移動，光照度低，就自動開燈。
最底仲可以set生效時間。
所以如果有埋溫濕度計，就可以set高過幾多度就開風扇/冷氣；
(冷氣就配合埋門窗感應，關晒門窗先會開)
低過幾多度開暖風機/暖爐；濕度高過幾多就開抽濕機；
有空氣檢測儀嘅話，就空氣差，開空氣清新機……如此類推。
當然啦，再進階啲仲可以裝小米電動窗簾，以日落日出時間去設定開關窗簾。
大致上就係咁啦，下一篇會講講易微聯(eWeLink)同埋塗鴉(Tuya)。
同埋會拍條片俾大家比較下綠米D1開關同易微聯WiFi開關嘅分別。